6 ნიშანი, რომ ნარცისი ცდილობს თქვენს განადგურებას

ნარცისებთან ურთიერთობა არ არის უბრალოდ ტოქსიკური - ეს არის ფსიქოლოგიური ბრძოლა სიცოცხლისთვის. ნარცისს არ სურს მხოლოდ თქვენი კონტროლი, მას სურს თქვენი განადგურება - არა ერთბაშად, არამედ ნელა, მეთოდურად, ისე, რომ ვერც კი გაიგებთ, როდის დაემსგავსეთ საკუთარი თავის აჩრდილს. მათი ჰობბი ხომ კაშკაშა ვარსკვლავების სიმაღლეზე აყვანა და იქიდან გადმოგდებაა?!

რატომ სურს ნარცისს "მსხვერპლის" განადგურება? იმიტომ, რომ მისთვის თქვენი არსებობა წარმოადგენს ერთდროულად საჭიროებასაც და საფრთხესაც. თქვენი დამოუკიდებლობა, თქვენი იდენტობა, თქვენი სიხარული და ბედნიერება - ყველაფერი ეს არის შეხსენება იმისა, რაც მას არ გააჩნია და ვერც ვერასდროს ექნება. ემპათიის არქონის გამო, ნარცისს არ შეუძლია ნამდვილი შინაგანი სიმშვიდის პოვნა, ამიტომ ის ცდილობს შურის გამო გაანადგუროს ის, რაც მას არ აქვს.

გთავაზობთ 6 საიდუმლო ნიშანს, რომლებიც მიუთითებს, რომ ნარცისს თქვენი ფსიქოლოგიური სიკვდილი სურს - არა ფიზიკური განადგურება, არამედ თქვენი სულის, იდენტობისა და სიცოცხლის ხალისის გაქრობა.

1. ფსიქოპათიური მზერა

როდესაც ნარცისი გიყურებთ ცივი, უემოციო, გამომეტყველებით, თითქოს მისი თვალები შავდება - ეს არის მომენტი, როდესაც მისი შინაგანი სიცარიელე ხდება ხილული. ეს მზერა არის "ფსიქოპათიური მზერა" - მტაცებლის გამოხედვა, რომელიც არ გიყურებთ როგორც ადამიანს, არამედ გაკვირდებათ როგორც ობიექტს.

რატომ გრძნობთ შიშს ამ დროს? იმიტომ, რომ თქვენი ქვეცნობიერი ამოიცნობს საფრთხეს. როდესაც ნარცისი ასე გიყურებთ, ეს არის მომენტი, როდესაც მისი "ცრუ მე" ეცლება და ჩნდება ნამდვილი, უნიღბო და უსულო არსება. თქვენი ინსტინქტები გეუბნებათ: "გაიქეცი". ეს არ არის უბრალოდ ბრაზი ან გაღიზიანება - ეს არის თქვენი არსებობის უარყოფა.

უცებ საკუთარ თავს ეკითხებით: "ვინ არის ეს ადამიანი?" ამ დროს გრძნობთ, რომ ნარცისი აღარ არის ის, ვინც გეგონათ. მისი თვალები გეუბნებათ ყველაფერს სიტყვების გარეშე - რომ თქვენი გაქრობა მას სიამოვნებას მიანიჭებს.

2. იზოლაციის ტაქტიკა

იზოლაცია არის ერთ-ერთი ყველაზე ძლიერი იარაღი ნარცისის არსენალში. მაგრამ რატომ? იმიტომ, რომ მარტოხელა ადამიანის მანიპულირება იოლია. როდესაც თქვენ გყავთ მხარდამჭერი ადამიანები, გაქვთ რეალობის შემოწმების საშუალება და ემოციური მხარდაჭერა გულშემატკივრებისგან, თქვენი შეცდომაში შეყვანა ძნელდება.

როგორ ახდენს ამას ნარცისი? ეჭვის მარცვლების დათესვით თქვენს გონებაში: "შენი მეგობარი არასდროს გხვდება, როცა გჭირდება", "შენი ოჯახი მხოლოდ მაშინ გირეკავს, როცა რაიმე სჭირდებათ", "არავინ აფასებს შენს ჭეშმარიტ ღირებულებას ისე, როგორც მე".

როდესაც უკვე საბოლოოდ იზოლირებული ხართ, ნარცისის ხმა ხდება ერთადერთი, რასაც ისმენთ. თქვენი რეალობა ყალიბდება მისი გავლენიდან და პერსპექტივიდან. როდესაც ცდილობთ დახმარების ძიებას, აღმოაჩენთ, რომ მარტო ხართ და ბოლოს მაინც ნარცისთან ბრუნდებით, რადგან ისღა დარჩა, ვისაც ენდობით.

თქვენი იმიჯის განადგურება, შეთქმულების ნაწილია. ეჭვის მარცვლების დათესვა, თქვენს გარემოცვაში დიდი ხანია დაიწყო ნარცისმა. ის ავრცელებს ჭორებს, ამახინჯებს თქვენს სიტყვებს და წარმოგაჩენთ არასტაბილურად, რათა როდესაც მხარდაჭერა დაგჭირდებათ, არავინ დაგიჯეროთ. რატომ? იმიტომ, რომ გასაქცევი არსად გქონდეთ და დამოკიდებული იყოთ ნარცისზე რაც შეიძლება მაღალი დოზით.

ნელ-ნელა, ადამიანები გერიდებიან, გშორდებიან, რაც კიდევ უფრო აძლიერებს თქვენს მარტოობას. მარტოობა კი იმდენად მძიმე ხდება, რომ იწყებთ ფიქრს - "რა აზრი აქვს? ვის ვადარდებ?"

3. თქვენი არსებობის საფუძვლების განადგურება

რატომ ანადგურებს ნარცისი თქვენს კეთილდღეობას? იმიტომ, რომ თქვენი წარმატება, თქვენი ფინანსური დამოუკიდებლობა, თქვენი კარიერა - ეს ყველაფერი ნიშნავს ძალას. ნარცისს არ სურს, რომ გქონდეთ საკუთარი რესურსები, რადგან ეს ნიშნავს, რომ ნაკლებად ხართ მასზე დამოკიდებული და შეგიძლიათ წასვლა.

როგორ ახერხებს ამას? არა პირდაპირი საბოტაჟით, არამედ ვირეშმაკური ხრიკებით (სუბტილური მანიპულაციით): თქვენი ყურადღების გაფანტვით მნიშვნელოვანი პროექტების წინ, ჩხუბის გამოწვევით ზუსტად იმ ღამით, როდესაც იცის, რომ დილით მნიშვნელოვანი შეხვედრა გაქვთ, არასწორი გადაწყვეტილებებისკენ ბიძგით…

უამრავ ნარცისგამოვლილს უთქვამს, რომ გაფრენის წინა დღეს იკარგებოდა მისი პასპორტი, მნიშვნელოვანი შეხვედრის წინ დალაქავდებოდა მისი კოსტიუმი და როდესაც ყველაფერი ჩაფლავდება, ის იტყვის: "ხომ გითხარი?!".

როდესაც წარუმატებლობა წარუმატებლობას ენაცვლება, იწყებთ ფიქრს, რომ თქვენ ხართ პრობლემა. ნარცისი გადააქცევს თქვენს ცხოვრებას უწყვეტი მარცხების სერიად, სანამ არ დაიჯერებთ, რომ უბრალოდ ვერაფერს აღწევთ. და როდესაც ამას გააცნობიერებთ, მოდიან ფიქრები: "იქნებ უკეთესი იქნებოდა, რომ უბრალოდ გავქრე?!"

4. მინიშნებები, რომ აქ თქვენი ადგილი აღარ არის

ეს არის ღალატის უკიდურესი ფორმა - ადამიანი, რომელსაც ენდობით, თურმე არის თქვენი ყველაზე დიდი მტერი. ეს ტოვებს მორალურ ჭრილობას, რომელიც ძნელად შუშდება.

როგორ აკეთებს ამას? არა პირდაპირი თქმით, არამედ შენიღბული კომენტარებით: "კიდე კარგად უძლებ, მე ვერ შევძლებდი", "შენს ადგილას, გაგრძელების ძალა აღარ მექნებოდა". ეს ნათქვამია თითქოს გარკვეული აღფრთოვანებით, მაგრამ ნამდვილი გზავნილი ნათელია - შენი მდგომარეობა უიმედოა!

და თუ ოდესმე აღიარებთ, რომ თავს უიმედოდ გრძნობთ, მიიღებთ გაიძვერულ ღიმილს და ნაცვლად დახმარებისა, ნარცისი მოკალათდება და გიყურებთ, როგორ ინგრევით. მას უხარია, რომ მისი პროცესი - თქვენში სიცოცხლის სურვილის დაშლა - მუშაობს. ის უზრუნველყოფს, რომ როდესაც დანებებას გადაწყვეტთ, ეს თქვენი იდეა გეგონოთ.

5. რომ მთელ მსოფლიოს სძულხართ

რატომ ცდილობს ნარცისისტი დაგარწმუნოთ, რომ ყველას სძულხართ? სოციალური იზოლაცია არის მხოლოდ პირველი ნაბიჯი. შემდეგი ნაბიჯია თქვენი დარწმუნება, რომ ეს იზოლაცია გამოწვეულია თქვენი პიროვნული ნაკლოვანებებით - რომ ადამიანები გერიდებიან იმიტომ, რომ თქვენ ხართ პრობლემა.

ხშირად გაიგებთ ფრაზებს: “ზედმეტად მგრძნობიარე ხარ”, “გიჟი ხარ”, “სამკურნალო ხარ” და ა.შ. ამ ფორმით იოლია ადამიანში დანაშაულის გრძნობა გამოიწვიო.

როგორ ახდენს ამას? უამრავი მანიპულაციაა ნარცისის შეიარაღებაში, რომელიც კოგნიტურ დისონანსს (საკუთარი აღქმის მიმართ კითხვების დასმა) იწვევს (Gaslighting-ი, ტრიანგულაცია…)

ის ამახინჯებს რეალობას იმდენად, რომ იწყებთ ამის დაჯერებას და როდესაც სრულად აღიარებთ, რომ ხართ ტვირთი სხვებისთვის, წყვეტთ ბრძოლას, წყვეტთ იმედის ქონას და თქვენში ისადგურებს ნიჰილიზმი, რომელიც ნარცისის გამარჯვებაა.

6. დეტალების შეგროვება როგორც იარაღი

თავდაპირველად გეჩვენებათ, რომ მათ აინტერესებთ თქვენი ცხოვრება, თქვენი წარსული, თქვენი შიშები და ოცნებები. მაგრამ ისინი არ აგროვებენ ამ ინფორმაციას თქვენს დასახმარებლად - ეს არის ნაღმი თქვენს წინააღმდეგ.

როგორ გამოიყენება ეს ინფორმაცია? ისინი ინახავენ ყველა დეტალს როგორც საბრძოლო მასალას, ელოდებიან იდეალურ მომენტს, რომ გამოიყენონ თქვენ წინააღმდეგ. ისინი დაამახინჯებენ თქვენს ყველაზე ცუდ გამოცდილებებს, რათა დაგარწმუნონ, რომ ყოველთვის პრობლემური იყავით, რომ კარგი არაფერი გამოგივათ, რომ არავის შეუძლია თქვენი ნამდვილად სიყვარული მის გარდა.

რატომ ახდენენ პროექციას? ისინი არა მხოლოდ საკუთარ ნაკლოვანებებს პროეცირებენ თქვენზე, შემოგაჩეჩებენ საკუთარ იდენტობას და უყურებენ, როგორ აწამებთ საკუთარ თავს ისეთი ნაკლოვანებებისთვის, რომლებიც სინამდვილეში მათია. ეს პროცესი იმდენად ნელია, რომ სანამ გააცნობიერებთ რა ხდება, აღმოაჩენთ, რომ უკვე გაუცვალეთ ნარცისს საკუთარი იდენტობა.

თუ ამ ნიშნებს საკუთარ ურთიერთობაში ამოიცნობთ, მნიშვნელოვანია გაიგოთ: ეს არ არის სიყვარული - ეს არის ფსიქოლოგიური მკვლელობა. ნარცისი არ გიბიძგებთ პირდაპირ უფსკრულისკენ - ის უბრალოდ უზრუნველყოფს, რომ თქვენ თავად მიხვიდეთ იქ.

ცოდნა ძალაა. როდესაც ამოიცნობთ ამ ნიშნებს, შეგიძლიათ დაიბრუნოთ მისგან თქვენი იდენტობა, თქვენი სიცოცხლის ხალისი, თქვენი ღირსება. გახსოვდეთ, რომ ნარცისის მიზანი არის წაგართვათ და მიისაკუთროს ყველაფერი, ხოლო მისი ობიანი შიდა სიცარიელე - თქვენ შემოგაჩეჩოთ.

როგორ ხდება ადამიანი ნარცისი?
ნარცისგამოვლილი ანი
ნარცისის აგენტები
ნარცისის კოდექსი
ნარცისი ქმარი
ნარცისი და ფანტაზია

დახმარებისთვის მოგვწერეთ - კონსულტაცია ანონიმური და უფასოა
ასევე შემოგვიერთდით Facebook -ის დახურულ ჯგუფში - NPD.ge